- محمد بن زايد

تقْبِل الأيام بِحمولٍ ثِقال **** وتنثِني وان صادِفَت منْكب صمل

بين دورات الليالي والنّزال **** ما يفوز الاّ من يعاضِد رَجِل

والرّجال انواع والوَقْفه سِجال **** حَد يَرهيها وحَد منها يِفل


وحَد لو ما قِلت له.. صاير تعال **** عارف المِدخَل وعارف من دِخَل
وعارف اجلال المعاني مِ الهِزال **** في أراضي المَعرفَه عقله بهَل

ذاك اخُوي مْحَمّد اللي يوم قال **** كلْمتَه ما تنثِني (قول وفِعِل)

طَوّع الصّعبات لين العود مال **** وانْطِوَت في قبضِتَه طَيّ السِّجِل

يا منار العلم لي ما عَنْك فال **** ضوء عِلْمِك في سِما العالم شِعَل


نِقتِدي بِك يوم لَارْيا في ضلال **** صار في القمه لِنا وَسْم وعَزِل
سيّدي يا سْناد عَزْمي بكِلّ حال **** والصعود وْياك جَنّبنا الفشل

إن لقيت لْيَه على الصعب احتِمال **** مَدّة ايدك خَلّت الكايِد سهل

والله انّك يوم صَكّات الحبال **** سيف يمنى حدّك رهيف النّصِل

تاج راسي عِزّ في سُود الليال **** عِزْوتي وان غِلْق للشيمه سِبِل

كم للدوله نِقَل كتفِك وشال **** إن خِلَص فَرضك تليته بالنّفل

من ينادي للأُمَم لا لانْفِصال **** يدرِك الحَسنات في لَمّ الشّمل

في عمار دْيارنا نضْرِب مِثال **** نحن ما نحسِب حسابات الجهل

من رِسَمها قبل يبني عَ (الرمال) **** يا أخو محمد له ايْردّ الفَضِل

نفْتِديها بكِل حال وكل مال **** مَجدِنا بالروح والدم انكِفَل

ومن يِحَسْب ديارنا لِقْمَة حَلال **** إن شِهَرنا سْيوفنا ما تِنْوِصِل

عَهْدِنا لِعيالِنا ما به انتشال **** وعهدهم إِلنا بعد ما يِنْتِش

كل يوم نْشُوم للنِّيف الطّوال **** دولٍة بافعال اهَلْها نحتِفِل

عَ العهود اجيال تِتْوارث فِعال **** في بناها لا تكِلّ ولا تِمِل

وللنّدا ما فيه (يمكِن) و(احتِمال) **** كل ما تِكبَر به الشدّه بِسَل

والهدف لو هو بِعيدٍ في الوِصال **** تلْحقَه لِعزوم لو عَنْها بِتَل

يحفَظ الله بْلادنا من شين فال **** ينْعِمون شْعوبها في طيب ظِل

ويِحفَظ الله في ميادين القِتال **** جِندنا لي ردّوا العِلْم العَدِل

وللملك سَلمان وقفات الجبال **** ما توفّيه القصايد والجُمَل

شَرّفِتني بالمَعاني وبالمِقال **** ولا يفوز الاّ من يعاضِد رَجِل